М.Бямбажав: Тоглолтдоо зориулж 4 дуугаа шинэчилж, дүрсжүүлсэн

bbbbbbbbbbbbbbbbbbbbbbbbbbbbbbbbb.jpg М.Бямбажав: Тоглолтдоо зориулж 4 дуугаа шинэчилж, дүрсжүүлсэн

-Та хэд дэх удаагийн тоглолтоо хийх гэж байна вэ?

 -Би өмнө нь МУГЖ Н.Чулуунхүү болон өөрийн багш, өөр  уран бүтээлчидтэй хамтран  10 гаруй тоглолт хийсэн. Энэ тоглолт миний бие даасан 11 дахь нь болж байна. Энэ тоглолтод би маш их ач холбогдол өгч байгаа. Өмнөх тоглолтуудад би өөрөө дуулахаас гадна бусад уран бүтээлч миний дууг дуулдаг байсан. Энэ удаа бүх дууны хөгжим, аялгууг орчин үетэй нийлүүлээд шинэчлэн дуулсан. Би Монголын ард түмний хөг аялгуугаар хөглөгдөж 30 гаруй жил дуулжээ. Тийм ч учраас “Түмэнтэйгээ” хэмээн тоглолтоо нэрлэсэн юм.  

 -Энэ удаагийн тоглолтын онцлог юу байх вэ?

 -Тоглолтоо өвөрмөц байлгах гэж хичээж л байна. Дууны хөгжмийг амьд хөгжмийн хамтлаг тоглоно. Зарим хүн чанга хөгжим сонсох дургүй байдаг. Тиймээс зарим дуугаа гитартайгаа дуулах байх. Тайз мэргэжлийн өндөр түвшинд засагдана. Тоглолтод өвөрмонголын дуучид хүрэлцэн ирж магадгүй.

 -Таныг бүжиглэдэг байсан гэж сонссон. Та тоглолтон дээрээ бүжиглэж гэнэтийн бэлэг барих юм биү биз?

 -Намайг бүжигчин байсныг мэддэг хүмүүс яг ингэж асууж байгаа. Аягатай биелгээ хийчихээр дараа нь амьсгаадаад дуулж чадахгүй юм болов уу гээд л эргэлзээд байна /инээв/.

  -Таны багш Н.Чулуунхүү гавьяат тоглолтод оролцох уу?

 -Оролцоно. Бид хамтдаа дуулсан дуугаа бүгдийг нь дуулна гэвэл бараг 2 шахуу концерт болчихно. Тиймээс олон нийтийн сонсох дуртай цөөн дууг хамтран дуулна.

  -Хөдөө орон нутгаар аялан тоглолт хийх үү?

 -Хоёрдугаар сарын 4-нд “Ub palace”-ын концертын танхимд тоглооод баруун аймгуудаар аялан тоглолт хийнэ. Хоёрдугаар сарын 8-нд Архангай аймагт, 9-нд Өвөрхангай, 10-нд Баянхонгор, 11-нд Говь-Алтай, 12-нд Ховд, 13-нд Увс, 14-нд Увсын Өндөрхангай суманд, 15-нд Завхан, 16-нд Хөвсгөл, 17-нд Булган 18-нд Эрдэнэт, 19-нд Сэлэнгэ, 20-нд Дарханд тоглоно. Гуравдугаар сард зүүн аймгуудаар тоглохоор төлөвлөж байна.

 -“Оройтсон бороо” дууг, дуучин Т.Аминатай хамтран дуулсан байна. Яагаад түүнтэй хамтрав?

 -Би бүжигчин байлаа. Дараа нь язгуур урлагаар хичээллэж, хөөмийчин явлаа шүү дээ. Сүүлдээ ая зохиодог болоод дуулдаг болсон. Тиймээс “Оройтсон бороо” дууны хөгжмийн найруулгыг эстрад маягт оруулъя гэж бодсон л доо. Анх нийтийн дуучдын нэг Гансувдтай хамтран дуулъя гэж санасан. Дараа нь Маралжингоо, Хишигдалайтай хамтарвал ч зүгээр шиг санагдлаа. Тэгж тэгж ерөөс Улсын филармонийн гоцлол дуучин Т.Аминатай хамтран дуулвал илүү зохилтой санагдаад сонгож дуулсан.

 

  -Тоглолтонд зориулж өөр дуугаа шинэчилж дуулав уу?

 -Миний “Мартагдашгүй хайр”, “Үгүйлэж явъя нэгнийгээ”, “Оройтсон бороо”, “Хайрын совин” зэрэг дуу бүгд клипгүй ард түмэнд хүрсэн байдаг. Тиймээс дөрвөн дууг шинэчлэн дуулж, клипжүүлсэн байгаа. Урлаг хөгширдөггүй. Тиймээс ч 1987 онд хийсэн дууг 2017 онд дүрсжүүлж байна. Мартагдсан бол орхичих л байсан. Гэвч ард түмэн хүссэн учраас хуучны дуунуудаа шинэчлэн дууллаа.

  -Таныг дуулахаас гадна ая зохиогч гэж хүмүүс тэр бүр сайн мэдэхгүй. Та хичнээн дууны ая зохиосон бэ?

 -Би цэргээс халагдаад 19 настайдаа “Оройтсон бороо” дууны аяыг зохиож байлаа. Мөн “Намирын гол”, “Буянаар учирсан амраг”, “Байна уу байна уу цагдаа”, “Учрахын хүслэн”, “Заавал уулзах тавилан” зэрэг 100 гаруй дууны ая зохиосон. Мөн багштайгаа хамтарсан олон дуу бий. Ая зохиогч, хөгжмийн зохиолч гэдэг хоорондоо ялгаатай. Миний хувьд хөгжмийн сургууль төгсөөгүй учраас ая зохионо гэдэг байгалиас заяасан авьяас юм болов уу гэж боддог. Зохиосон дуу маань ард түмэнд хүрсэнд баярлаж явдаг.

  -Гитар таны амьдралын туршид үнэнч “найз” байсаар ирсэн байх аа?

 -Тийм шүү. Би гитартай дуунаас уран бүтээлийн гараа эхэлсэн. Тухайн үед гитараас өөр хөгжим МҮЭСТО-нд байсангүй. Тэгэхэд бид Улаанбаатар хотод 7 хоног тоглодог байсан. Тоглолт хийхдээ банзан гитартайгаа  бүх дуугаа дуулдаг байлаа шүү дээ.  Сүүлд "Зургаа дал" гэдэг хөгжим гарч ирсэн дээ.

  -Ард түмэн таныг хэдий нь гавьяатад өргөмжилсөн. Энэ талаар та ямар бодолтой явдаг вэ?

 -Ард түмэн намайг хүндэлдэг учраас би гавьяа шагнал горьдож явдаггүй. Хөдөлмөрийн хүндэт медаль, Алтан гадас, Хөдөлмөрийн гавьяаны улаан тугийн одон гээд авах ёстой шагналаа авсан. Энэ одонгуудаа зүүгээд явж байхад надад дүүрэн байдаг юм. Түүнээс МУГЖ цол авсангүй, өгсөнгүй гэх бодол, санаа надад байдаггүй юм. Хүмүүс л “Гавьяат авах болоогүй юм уу” гэж их асуудаг. Тэр цолыг нь зах дээрээс очиж худалдаж авалтай бишдээ /инээв/.

 Н.Гэрэл

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ